【精神病．人】 我有一個 精神病兒子
現年80歲的麗婆(化名)跟做海員的丈夫，育有三女一子，丈夫對幼子更疼愛有加，一家生活美滿。但十多年前，因為兒子得到一個病，令麗婆想過輕生，丈夫日夜咒罵兒子，一家和諧的生活，從此起了重大變化。記者：劉嘉欣
攝影：楊觀賜
「萬一佢去斬人點算呢？總言之咩兇殘行為，全部都諗會發生在精神病人身上！」這是麗婆知道兒子患上精神分裂後的第一個反應。「那時無咁多資訊，而家你開收音機又有資訊，開電視又有資訊，乜都知。當時真係唔知，咁就拖了佢咁耐，一半都係我自己問題，我累了佢。」自言自己學識少，對精神病人一無所知的麗婆，就這樣一直照顧了兒子十多年。
「起初發現唔到，佢都會返工。後來無端端辭了份工，日日如是，唔出街食飯！」親戚朋友開始懷疑兒子有事，麗婆帶兒子看醫生，但醫生指麗婆兒子只是懶惰。「後來愈整愈唔妥，又話要做和尚，又話要想死。咁就真係好驚，點解會咁呢？」麗婆於是帶兒子再求診。「原來已經係精神分裂喇！當時嚇到我，於醫務所處暈倒。」
自覺連累兒子，麗婆四處尋找醫生、資訊，希望可以緩解兒子的病情。她自言自己是幸運的一個，因為大部份親戚朋友，甚至鄰居，都沒有因為兒子的病而對她冷言冷語。不過，最親的一位身邊人，卻嫌棄親生兒子，令麗婆心力交瘁。「佢（丈夫）就覺得好失望，可能佢對個仔期望高。日鬧夜鬧，鬧到個仔出去騎樓到，睇住條街傻笑。佢仲要話，你企於階磚上，都阻住塊階磚，係咩意思？咪即係叫個仔去死。」
為了令一家人回復昔日快樂的生活，麗婆試過捧一杯茶，跪地勸丈夫不要再罵兒子，可惜無用。家無寧日，加上要照顧兒子，麗婆陷入崩潰邊緣。「有次真的罵得好緊要，我自己那一剎那，就走出去騎樓，想跳落去！咁我先生好高大，佢一手扯我回來，我個仔跟住攬住我。個仔發病，受這些苦，真係好難受！自己都驚自己捱唔住。我好難過，點解反而親戚朋友都支持，點解佢（丈夫）會咁！」
結果，麗婆三個女兒，合資替爸爸另覓新居所。
對於麗婆一直照顧自己，麗婆的兒子心存感激，「有一晚佢（兒子）搭住我膊頭，坐在沙發說：『媽咪好多謝你，我病緊你咁樣照顧我。』我當時覺得佢，真係行出第一步，識得講呢句說話。」回想起兒子告白，麗婆不禁流出感動的眼淚。
雖然兒子的情況慢慢穩定下來，但年紀老邁的麗婆，已經開始為兒子打算。「我話如果媽咪真係有朝一日走左，你唔駛驚，如果有身體問題或者有咩想問，就打畀幾個家姐。」
十多年，即使辛苦，麗婆一直無怨無悔，給予兒子無限量支持。但其實，麗婆需要的支持，不會比兒子少，關心精神病患者的同時，他們身邊的照顧者，或許更需要我們關心及尊敬。
資料來源:
蘋果日報 2015-03-29 【精神病．人】我有一個 精神病兒子 - http://s.nextmedia.com/apple/